Martirizohen 3 anëtarë të Hezbollahut në sulmin izraelit me dron në fshatin jugor të Libanit
Burime ushtarake libaneze thanë se tre luftëtarë të lëvizjes së rezistencës Hezbollah ranë dëshmorë në një sulm ajror izraelit në Libanin jugor, mes tensioneve të përshkallëzuara përgjatë kufirit midis kombit arab dhe territoreve të pushtuara të vitit 1948.
Burimet, duke folur në kushte anonimiteti, thanë se një dron izraelit lëshoi katër raketa ajër-tokë në një ndërtesë dykatëshe në fshatin Houla, duke martirizuar tre anëtarë të Hezbollahut.
Sulmi ajror shkaktoi gjithashtu dëme të mëdha edhe në banesat fqinje.
Burimet shtuan se ushtria izraelite kreu pesë sulme ajrore në fshatrat Taybeh, Rab El-Thalathine dhe Houla dhe goditi tetë qyteza dhe fshatra në rajonet lindore dhe qendrore me rreth 40 predha artilerie.
Nga ana e tij, Hezbollahu njoftoi se kishte sulmuar disa pozicione ushtarake izraelite, përkatësisht bazën Misgav Am në rajonin e Galilesë së Epërme, postën ushtarake në vendbanimin sionist Metulla dhe vendndodhjen Ruwaisat al-Alam në Kodrat Kfar Shuba.
Hezbollahu dhe Izraeli kanë shkëmbyer zjarr vdekjeprurës që nga fillimi i tetorit të vitit të kaluar, menjëherë pasi regjimi filloi një agresion gjenocidal kundër Rripit të Gazës pas një operacioni të befasishëm nga grupi i rezistencës palestineze Hamas.
Hezbollahu është zotuar të vazhdojë sulmet e tij hakmarrëse për sa kohë që regjimi i Tel Avivit vazhdon luftën e tij në Gaza, e cila deri më tani ka vrarë të paktën 37 mijë e 877 palestinezë, kryesisht gra dhe fëmijë, dhe ka plagosur 86 mijë e 969 të tjerë.
