Wanamapambano wa Kipalestina wajiweka tayari Ukanda wa Ghaza kukabiliana na Wazayuni

Harakati ya Mapambano ya Kiislamu ya Palestina (Hamas) imewaagiza wapiganaji wake kujiweka tayari kufuatia kuuliwa shahidi na kujeruhiwa wanamuqawama wake kadhaa huko Khan Yunis kusini mwa Ukanda wa Ghaza. Mauaji hayo yamefanywa na Wazayuni.

Hamas imesema katika taarifa yake kuwa kufuatia kuuawa shahidi na kujeruhiwa idadi kadhaa ya wanamuqawama wake huko Khan Yunis na Wazayuni, inawaagiza wanamapambano wako wajiweke tayari na wakati huo huo kuutahadharisha utawala wa Kizayuni kuwa italipiza kisasi damu hiyo ya mashahidi wake.  

Wapalestina kadhaa wameuliwa shahidi na kujeruhiwa katika mashambulizi ya anga na nchi kavu yaliyofanywa na utawala wa Kizayuni katika maeneo tofauti kusini mwa Ukanda wa Ghaza. Televisheni ya al Aalam imetangaza kuwa idadi ya Wapalestina waliouliwa shahidi mashariki mwa mji wa Khan Yunis huko Ghaza katika mapigano kati ya wanajeshi wa utawala wa Kizayuni na wanamapambano wa Palestina imeongezeka na kufikia watano na kwamba mapigano yangali yanaendelea. Aidha Wapalestina wawili wameuliwa shahidi na wawili kujeruhiwa katika shambulio la anga la jeshi la utawala wa Kizayuni kusini mwa Ukanda wa Ghaza.