FAO: Njaa inatishia eneo la mashariki mwa Afrika

Shirika la Chakula na Kilimo la Umoja wa Mataifa (FAO) limetahadharisha kuhusu ongezeko la vifo vya watu kutokana na ukame na njaa katika maeneo ya mashariki mwa Afrika.

Taarifa iliyotolewa na FAO imesema kuwa, mwenendo wa kuongezeka vifo vya watu na mifugo kutokana na njaa na ukame katika eneo la mashariki mwa Afrika unatia wasiwasi mkubwa. 

Shirika la FAO limeongeza kuwa, idadi ya watu waliofariki dunia au kukumbwa na njaa imeongeza sana katika eneo la mashariki mwa Afrika kutokana na kupungua kwa mvua na mabadiliko ya hali ya hewa ya El Nino. 

Shirika la Chakula na Kilimo la Umoja wa Mataifa limeongeza kuwa: Kwa sasa karibu watu milioni 8 na nusu wa Ethiopia wanasumbuliwa na njaa na kwamba hali ya watu milioni tatu miongoni mwao inatia wasiwasi mkubwa.

Vilevile shirika hilo limeeleza wasiwasi wake kuhusu hali ya kilimo na ufugaji huko mashariki mwa Afrika kutokana na ukame ulioyakumba maeneo hayo na limeitaka jamii ya ya kimataifa kusaidia juhudi za kukabiliana na hali hiyo.