FAO: Zaidi ya watu milioni 220 wanakabiliwa na njaa barani Afrika
Shirika la Chakula na Kilimo la Umoja wa Mataifa (FAO) limetangaza kuwa, zaidi ya watu milioni 220 wanakabiliwa na baa la njaa barani Afrika.
Kanali ya Televisheni ya al-Jazeera ya Qatar imelinukuu Shirika la Chakula na Kilimo la Umoja wa Mataifa (FAO) katika kikao chake huko Khartoum Sudan na kutangaza kuwa, kwa sasa zaidi ya watu milioni 220 barani Afrika wanakabiliwa na baa la njaa.
Ripoti ya Shirika la Chakula na Kilimo la Umoja wa Mataifa (FAO) imeeleza kuwa, ukame na machafuko katika baadhi ya nchi za Kiafrika ni mambo ambayo yamesababisha mamilioni ya watu barani Afrika kuyakimbia makazi yao na hivyo kutelekeza mashamba yao jambo ambalo limezidisha tatizo la chakula barani humo.
Akihutubia katika mkutano huo José Graziano da Silva, Mkurugenzi Mkuu wa Shirika la Chakula na Kilimo la Umoja wa Mataifa (FAO) amesema kuwa, ukosefu wa usalama wa chakula daima limekuwa likihesabiwa kuwa tatizo kuu barani Afrika.
Mamia ya wawakilishi wa nchi za Kiafrika wamekutana huko Khartoum mji mkuu wa Sudan katika mkutano wa 30 wa kieneo wa Shirika la Chakula na Kilimo la Umoja wa Mataifa (FAO).
Lengo la mkutano huo uliomalizika jana Jumamosi lilikuwa kujadili njia za kukabiliana na umasikini na suala la ukosefu wa usalama wa chakula barani Afrika.
