Magaidi 7 wa al-Shabaab waangamizwa na askari kusini mwa Somalia
Wanachama kadhaa wa kundi la kigaidi na kitakfiri la al-Shabaab wameangamizwa katika operesheni ya jeshi la Somalia huko kusini mwa nchi hiyo ya Pembe ya Afrika.
Kamanda wa Kikosi cha 66 cha Jeshi la Taifa la Somalia, Ahmed Maslah amesema wapiganaji wasiopungua saba wa al-Shabaab wameuawa kwenye mapambano makali na jeshi la Somalia katika mji wa Awdhigle mkoani Lower Shabelle, kusini mwa Somalia.
Ameeleza bayana kuwa, vikosi vya usalama vinaendelea kuwasaka wapiganaji wengine wa al-Shabaab waliokimbilia msituni baada ya kujiri makabiliano hayo.
Vikosi vya serikali ya Somalia hivi karibuni vimeimarisha operesheni dhidi ya genge la al-Shabaab kwenye maeneo ya kusini mwa nchi hiyo.
Hii ni katika hali ambayo, Jumatatu iliyopita, raia saba waliuawa katika shambulizi la kigaidi lililofanywa na wanachama wa al-Shabaab mjini Hudur, eneo la Bakool, kusini magharibi mwa Somalia.
Aidha hivi karibuni, gaidi mmoja aliyekuwa amejifunga mabomu alijiripua nje ya msikiti mmoja katika mji wa Kismayo wa kusini mwa Somalia na kuua kwa uchache Waislamu wawili na kujeruhi wengine 12.
