Abbas Mousavi: Mazungumzo ya JCPOA kati ya Iran na Ulaya hayajafikia natija

Msemaji wa Wizara ya Mashauri ya Kigeni wa Jamhuri ya Kiislamu ya Iran ameashiria mwenendo wa mazungumzo ya Iran na madola ya Ulaya kuhusiana na makubaliano ya nyuklia ya JCPOA na kusema kuwa, mazungumzo kuhusiana na uwajibikaji wa Ulaya katika JCPOA hadi sasa hayajawa na natija.

Sayyid Abbas Mousavi amesema hayo leo katika mkutano wake na waandishi wa habari wa ndani na wa nje ambapo sambamba na kubainisha kwamba, hatua ya tatu ya Iran kupunguza uwajibikaji katika makubaliano ya nyuklia inaratibiwa ameongeza kuwa, baada ya kumalizika muda ilioutoa Iran kwa madola ya Ulaya, hatua ya tatu ya Tehran kupunguza uwajibikaji wake itaanza kutekelezwa.

Sayyid Abbas Mousavi amesema pia kuwa, kuachiliwa meli ya mafuta ya Iran iliyokuwa imeshikiliwa hakuna uhusiano wowote na hatima ya meli ya mafuta ya Uingereza inayoshikiliwa kutokana na kukiuka sheria.

Msemaji wa Wizara ya Mashauri ya Kigeni wa Iran ameashiria kufanyika kikao cha pande tatu cha

Iran, ujumbe wa Ansarullah na nchi nne za Ulaya hapa mjini Tehran kuhusiana na mgogoro wa Yemen na kueleza kwamba, kulifanyika mazungumzo mazuri na yenye mafanikio na kwamba, Iran ina matumaini ya kufikiwa utatuzi wa kisiasa kuhusiana na mgogoro wa Yemen.

Kuhusiana na mazungumzo ya amani ya Afghanistan, msemaji wa Wizara ya Mashauri ya Kigeni wa Iran amesisitiza kuwa, daima Tehran imekuwa ikiunga mkono suala la kurejeshwa amani na uthabiti katika nchi hiyo.