Foleni za watu wenye njaa huko Ghaza zimezidi kuwa ndefu + Picha
Licha ya kusitishwa mapigano huko Ghaza, lakini bado mateso ya njaa na ukosefu wa usalama na utulivu wa nafsi yanaendelea kuzisumbua familia za Wapalestina. Foleni ndefu za watu wenye njaa wanaosubiri kupata angalau mlo mmoja kwa siku zinaendelea kuonekana katika pembe mbalimbali za ukanda huo huku jeshi katili la Israeli likiendeleza mashambulizi ya mara kwa mara na kuzuia kuwafikia misaada wananchi hao wasio na ulinzi.
Ripota wa televisheni ya Al-Alam ameripoti kutoka Ghaza kwamba, mateso ya wananchi wa Ghaza hayana dalili za kumalizika; kusitishwa vita hakujasaidia kupungua mahitaji yao makubwa kutokana na Israel kupiga marufuku kuingia misaada vile inavyotakiwa. Familia zilizopoteza makazi yao zinaendelea kuteseka kwa ugumu wa maisha na zinashindwa kukidhi hata mahitaji yao ya kimsingi ya kila siku.
Ripoti hiyo imeongeza kuwa, mistari mirefu inaonekana kila siku kwenye vituo vya kugawa chakula cha hisani kwa matumaini ya kupokea angalau mlo mmoja kwa siku, huku jeshi la Israeli likiendelea kuzuia malori ya misaada ya kibinadamu kuingia Ghaza.
Mkazi mmoja wa Ghaza ambaye familia yake ina watu 22 amemwambia mwandishi huyo wa televisheni ya Al-Alam kwamba: "Unapomsikia mwanao anakuamsha usiku mkubwa na kukwambia: 'Baba, nina njaa...' Utamwambia nini? 'Hatupati mkate, hatuna unga, hatupati msaada wowote."
Ripoti hiyo imeongeza kuwa, wakazi wa Ghaza wanasema kwamba madai ya adui Mzayuni ya kwamba mamia ya malori yaliyobeba misaada ya kibinadamu yameingia Ghaza ni ya uwongo kabisa kwa sababu kama misaada ingefika kweli, wasingelikuwa na uhaba wa maji, mikate, chakula na dawa na wala wasingeendelea kuteseka kwa umaskini, njaa na magonjwa huko Gaza.
Kwa mujibu wa televisheni hiyo, jeshi la Kizayuni limesababisha njaa kwa makusudi ili kuwalazimisha maelfu ya Wapalestina wahame Ghaza.
Hapa chini tumeweka baadhi ya picha zinazoonesha wananchi wa Ghaza wanavyoteseka kwa njaa na jinsi foleni ndefu za kusubiri chakula zinavyoonekana kwenye maeneo tofauti:
