Kufuatiliwa kisheria hatua za kigaidi za Donald Trump dhidi ya Iran

Waziri wa Mambo ya Nje wa Jamhuri ya Kiislamu ya Iran amesema kuwa, Tehran hivi sasa iko katika mchakato wa kufuatilia kisheria katika taasisi za kimataifa; hatua tatu za kigaidi zilizochukuliwa na Marekani dhidi ya Iran.

Akihojiwa na televisheni ya Al Mayadeen ya nchini Lebanon, Muhammad Javad Zarif amesema, Iran inamfuatilia kisheria rais wa Marekani, Donald Trump katika mahakama za kimataifa kwa makosa ya kuifanyia Iran ugaidi wa kiserikali, ugaidi wa kiuchumi na ugaidi wa kiutamaduni. 

Vitendo viovu vya serikali ya Trump mbali na kudhihirisha sura chafu ya Marekani licha ya nchi hiyo kujinadi kuwa ni kiranja wa kutetea haki za binadamu, vinaonesha pia kiwango cha juu zaidi ya chuki za serikali ya hivi sasa ya Marekani dhidi ya taifa la Iran. 

Uadui wa serikali ya Trump kwa taifa la Iran unakanyaga waziwazi sheria za kimataifa na hati ya Umoja wa Mataifa na vinaonesha pia kwamba serikali ya Trump imefikia hadi ya kutumia vitendo vya kigaidi kujaribu kuishinikiza nchi ambayo haiko tayari kuburuzwa, inataka kuwa huru na wananchi wake wanapenda kujiamulia wenyewe mambo yao bila ya kuingiliwa na maajinabi.

Mara tu baada ya kuingia katika Ikulu ya Marekani, White House, Donald Trump alizidisha maradufu uadui wa Washington dhidi ya Iran. Muda wote rais huyo wa Marekani amekuwa akijigamba kuwa ameiwekea Iran vikwazo vya kiwango cha juu kabisa kuwahi kuwekewa nchi yoyote ile dunia, na hakubakisha sekta yoyote, bali amewawekea vikwazo wananchi wa Iran hata vya vyakula na madawa ambayo ni mahitaji ya kimsingi kabisa ya kila mwanadamu.

Jinai ya Marekani ya kuzuia kuingia chakula nchini Iran inakanyaga moja kwa moja haki ya kila mwanadamu ya kuwa na chakula cha kumuwezesha kuishi hivyo jinai hiyo kusema kweli inakanyaga waziwazi sheria za kimataifa na maazimio ya Umoja wa Mataifa.

Jinai za serikali ya Trump dhidi ya taifa la Iran haziishii tu kwenye ugaidi wa kiuchumi; bali ukhabithi wa serikali ya hivi sasa ya Marekani umefika mbali kiasi kwamba hata viongozi wa White House wamejipa uthubutu wa kumuua kigaidi shujaa wa kitaifa wa Iran na kamanda wa kweli wa vita dhidi ya ugaidi, akiwa uraiani - si kwenye medani ya vita - tena akiwa mgeni rasmi wa serikali ya nchi nyingine huru. Ukhabithi wa Marekani wa kumuua kigaidi Luteni Jenerali Qassem Soleimani, Kamanda wa Kikosi cha Quds cha Jeshi la Walinzi wa Mapinduzi ya Kiislamu SEPAH akiwa mgeni rasmi wa serikali ya Iraq, kwa kweli ni uvunjaji wa wazi kabisa wa sheria zote za kimataifa zinazopiga marufuku kutumia mabavu na zinazohimiza kuheshimiwa haki ya kujitawala nchi nyingine, kuchukungwa misingi ya kidiplomasia pamoja na haki za watu binafsi na za kimataifa.

Noam Chomsky, mwana nadharia wa Kimarekani amesema kuhusu madhara ya kitendo cha kigaidi cha Trump cha kumuua kidhulma Luteni Jenerali Qassem Soleimani kwamba, kumuua Kamanda Soleimani ni kitendo cha kigaidi kinachokwenda kinyume na sheria zote za kimataifa. 

Hivyo tunapozingatia yote hayo tutaona kuwa, suala la kumshtaki na kumfuatilia kisheria rais wa Marekani Donald trump, katika taasisi na mahakama za kimataifa, ni haki ya kimsingi na kisheria ya Jamhuri ya Kiislamu ya Iran na kwamba kinachotarajiwa kutoka kwa taasisi hizo za kimataifa ni kulipa uzito mkubwa suala suala hilo la kumpandisha kizimbani Trump. Iwapo taasisi hizo zitaonesha udhaifu katika suala hilo, zitakuwa zimefungua mlango wa kufanyika ugaidi hatari zaidi duniani utakaohatarisha usalama na amani ya dunia nzima.

Mbali na kuweko udharura wa kupandishwa kizimbani Trump katika mahakama za kimataifa, majibu hasa ya jinai ya Marekani ya kumuua kigaidi Luteni Jenerali Soleimani, ni kufukuzwa wanajeshi wote magaidi katika eneo la Asia Magharibi na hiyo ndiyo hamu kubwa ya wananchi wa eneo hili.