Umuhimu wa kufanyika Kongamano la 31 la Nyuklia la Iran

Kongamano la 31 la Nyuklia la Iran linafanyika katika mji mtakatifu wa Mashhad, na kuhudhuriwa na wasomi wa kisayansi, sekta binafsi na wasomi vijana wa Iran.

Kongamano hilo linalotazamiwa kufungwa rasmi leo Alkhamisi limekuwa likifanyika katika mji huo mtakatifu kuanzia Jumanne, Mei 13, kwa hisani ya Jumuiya ya Nyuklia na kwa uungaji mkono wa Shirika la Nishati ya Atomiki la Iran. Mada kuu zinazojadiliwa katika kongamano hilo ni pamoja na "Matumizi ya Mionzi na Teknolojia Mpya ya Mionzi", "Fizikia na Teknolojia ya Mchanganyiko wa Nyuklia na Plasma", "Vinu vya Nyuklia na Teknolojia za Quantum", "Mzunguko wa Nishati na Mada za Nyuklia" pamoja na "Udhibiti wa Nyuklia na Maendeleo Endelevu".

Tukio hili muhimu la kisayansi ni fursa ya kubadilishana maoni, kuwasilisha mafanikio mapya na kuendeleza ushirikiano wa kitaifa katika uwanja wa sayansi na teknolojia ya nyuklia. "Matanuri ya utafiti duniani na matumizi yake", "Kuarifishwa mfumo wa kupiga picha wa nutroni katika kinu cha Tehran,"  "Upimaji wa nishati katika kinu cha Tehran" na Kuarifishwa matanuri ya utafiti ya Isfahan" ni baadhi tu ya anwani za mada zilizojadiliwa katika siku ya kongamano hilo.

Pambizoni mwa siku ya kwanza ya Kongamano la 31 la Nyuklia la Iran, "Jopo la Ufuatiliaji wa Nyuklia" pia lilitambulishwa rasmi.  Zaidi ya wahusika 1,200 wa sekta ya nyuklia, wakiwemo kutoka vyuo vikuu, wahadhiri na wanachuo, sekta binafsi na baadhi ya wasimamizi na wanasayansi wa sekta ya nyuklia, wamehudhuria kongamano hilo.

Javad Karimi Sabet, Naibu Mkuu wa Shirika la Nishati ya Atomiki la Iran alisema katika siku ya kwanza ya kongamano hilo kwamba linafanyika kwa mujibu wa ratiba yake ya kawaida na kwamba halihusiani kwa vyo vyote vile na mazungumzo ya nyuklia yanayofanyika na Marekani. Ujumbe unaotolewa ni kwamba Wamagharibi wanapotazama wingi na utofauti wa shughuli za nyuklia nchini Iran, wanatambua kwamba teknolojia hii imekita mizizi kote nchini na kuwa haiwezi kufutwa nchini.

Naibu Mkuu wa Shirika la Nishati ya Atomiki la Iran ameongeza kuwa sekta ya nyuklia inazinufaisha pia sekta nyingine nyingi. Teknolojia hii inaweza kutumika katika nyanja za anga za mbali, uchukuzi na usafirishaji. Ustawi wa teknolojia hii kwa hakika unaweza kuimarisha mfumo wa ikolojia nzima ya nchi.

Kufanyika kwa Kongamano la 31 la Nyuklia la Iran kuna umuhimu mkubwa katika pande mbalimbali za ndani na kimataifa. Kongamano hili  ni tukio kubwa zaidi la kisayansi nchini Iran na mjumuiko wa kisayansi wa kifahari zaidi katika uwanja wa sayansi na teknolojia ya nyuklia, ambao unafanyika kwa kushirikisha mamia ya wataalamu, wahadhiri, wanachuo, watafiti na wawakilishi wa teknolojia ya nyuklia, na pia una jukumu muhimu katika kuimarisha ushirikiano wa kisayansi.

Zaidi ya makala 520 ya kisayansi yamewasilishwa katika kongamano hilo ambapo yanajumuisha matokeo ya utafiti wa hivi karibuni katika nyanja za nyuklia, teknolojia ya quantum, mzunguko wa nishati, nishati safi, mionzi katika uzalishaji dawa na sekta nyinginezo za nyuklia. Kufanyika kongamano hili la kisayansi bila shaka kutaimarisha ushirikiano kati ya vyuo vikuu vya kifahari vya nchi na taasisi za serikali na viwanda, na hivyo kuimarisha maingiliano kati ya vituo vya kitaaluma na utawala.

Jambo muhimu na la kuvutia lililoonekana katika kongamano hili ni ushiriki mkubwa wa wanachuo vijana, ambao ushiriki wao unaweka msingi wa kulea kizazi kijacho cha wataalamu wa nyuklia nchini. Kwa mujibu wa mipango mipya, kongamano hili linatazamiwa kufanyika kimataifa kila baada ya miaka miwili. Hili pia linaonyesha lengo la diplomasia ya kisayansi la kuvutia ushirikiano wa kigeni katika siku zijazo.

Kwa tathmini jumla, tunaweza kusema kuwa kutokana na kufanikiwa kwa malengo ya Kongamano la  31 la Nyuklia la Iran, Jamhuri ya Kiislamu ya Iran imeweka mikakati kabambe kwa ajili ya kufanikisha mpango wake wa amani wa nyuklia katika miaka ijayo katika nyanja mbalimbali za kisayansi, kiuchumi na kiviwanda. Bila shaka mashirikiano ya wasomi bingwa wa kisayansi na sekta binafsi na za umma, kutaharakisha mchakato wa maendeleo ya sekta ya nyuklia nchini.

Kufanyika kongamano hili pia kunaakisi ukweli kwamba, kizazi kipya cha wasomi wa Iran, licha ya vikwazo na vizingiti vyote vinavyowekwa na nchi za Magharibi, kinaendelea kuzalisha elimu katika sekta mbalimbali za nyuklia, na katika mwelekeo huu, kinazidi kupata uwezo na mafanikio zaidi na mawazo mapya siku baada ya siku.

Kufanyika Kongamano la 31 la Nyuklia la Iran kunaonyesha umuhimu wa kukua na kustawi sekta ya nyuklia ya Iran na matumizi yake katika nyanja mbalimbali za matibabu, dawa na viwanda, jambo ambalo linaashiria nafasi ya Iran katika  maendeleo ya sekta ya nyuklia katika eneo.