Drita jeshile gjermane për dërgimin e raketave cruise Taurus për ushtrinë e Kievit
Qeveria federale gjermane po shqyrton se si Gjermania mund të dërgojë raketa cruise Taurus në Ukrainë nga stoku i Bundeswehrit në muajt e ardhshëm, raportoi revista gjermane Der Spiegel.
Bisedimet mbi këtë çështje janë duke vazhduar mes Ministrisë së Mbrojtjes dhe industrisë së mbrojtjes së Gjermanisë. Der Spiegel gjithashtu raportoi se Ministria e Mbrojtjes i kishte kërkuar prodhuesit Taurus të integronte një kufizim për programimin e objektivave në raketën cruise. Kancelari Olaf Scholz dëshiron të përdorë modifikime teknike për të parandaluar Ukrainën të kryejë sulme në territorin rus me sisteme të armëve me rreze të gjatë. Sipas raportit, qarqet e industrisë thanë se një kufizim i tillë i sistemit është plotësisht i mundur, por do të zgjasë disa javë. Qeveria federale deri më tani ka hezituar sepse raketa Taurus mund të arrijë edhe në territorin rus. Megjithatë, Gjermania planifikon të njoftojë së shpejti dorëzimin e këtyre raketave për ushtrinë e Kievit. Raketa cruise Taurus është projektuar për goditje me precizion të lartë dhe shkatërrimin e objektivave shumë të mbrojtur në një distancë deri në 500 kilometra.
