Ireland, Norway, Uhispania zimetambua rasmi taifa la Palestina
Ireland, Norway na Uhispania zimetangaza kulitambua rasmi taifa la Palestina, jambo ambalo limeukasirisha sana utawala haramu wa Israel
"Leo Ireland, Norway na Uhispania zinatangaza kwamba tunatambua hali ya Palestina, kila mmoja wetu atachukua hatua zozote za kitaifa zinazohitajika kutekeleza uamuzi huo," Waziri Mkuu wa Ireland Simon Harris amesema katika mkutano na waandishi wa habari huko Dublin leo Jumatano.
"Nina imani kuwa nchi zaidi zitaungana nasi katika kuchukua hatua hii muhimu katika wiki zijazo."
Ameongeza kuwa hatua hiyo ni kauli ya "uungaji mkono usio na shaka" kwa kile kinachoitwa suluhisho la serikali mbili, ambayo ameielezea kuwa "njia pekee ya kuaminika ya kupatikana amani na usalama."
Muda mfupi baada ya kauli ya Harris, mwenzake wa Uhispania Pedro Sanchez na Waziri Mkuu wa Norway Jonas Gahr Store walisema nchi zote mbili zitalitambua taifa la Palestina kuanzia tarehe 28 Mei.
Sanchez amesema ni wazi kwamba "waziri mkuu [wa Israel] Benjamin Netanyahu hana mradi wa amani kwa Palestina."
Store, kwa upande wake, amebainisha kuwa hakuwezi kuwa na amani katika eneo la Asia Magharibi ikiwa hakuna kutambuliwa taifa la Palestina.
Israel mara moja ilitangaza kuwa inawaita nyumbani mabalozi wake kutoka Ireland na Norway kwa "mashauriano ya haraka."
Waziri Mkuu wa Uhispania amekuwa mmoja wa viongozi wa Ulaya wanaopinga waziwazi vita vya mauaji ya halaiki vya utawala wa Israel dhidi ya Gaza.