Jeshi la Iran la IRGC lasema litazindua zana za kivita zitakazomshangaza adui

Jeshi la Iran la Walinzi wa Mapinduzi ya Kiislamu (IRGC) limesema kuwa liko tayari kutangaza mafanikio mapya pamoja na zana za kushangaza za kivita zinazozidi upeo wa kuelewa wa adui, likionya kuwa kila kitendo kipya cha uchokozi kitapata majibu makali.

Katika taarifa iliyotolewa Jumatano, wakati wa kumbukumbu ya siku ya kuanzishwa kwake, IRGC imejitaja kama nguvu ya wananchi iliyo imara, iliyo tayari kufikia mafanikio makubwa na kuonyesha uwezo mpya katika uwanja wa mapambano dhidi ya adui msumbufu na asiyeaminika.

Taarifa hiyo imesema kuwa wananchi wa Iran wanajivunia uwezo mpana wa kimkakati wa IRGC pamoja na matawi mengine ya Vikosi vya Ulinzi, ikibainisha kuwa mashambulio yake ya makombora na ndege zisizo na rubani yameyaweka majeshi ya Israel na Marekani katika hali ya kulegalega na udhaifu.

IRGC imeashiria kile ilichokiita “ukimya wa sasa wa mapambano ya kijeshi,” na kusisitiza umuhimu wa kuwa macho na kufuatilia kwa karibu mienendo ya adui wakati wa mazungumzo na kipindi kinachoitwa usitishaji wa mapigano.

Taarifa hiyo iliongeza kuwa kwa juhudi za Vikosi vya Ulinzi vya Iran—hasa IRGC—miundombinu mikubwa ya kijeshi ya majeshi ya Israel na Marekani katika eneo hilo imeharibiwa kwa kiwango kikubwa.

Aidha, taarifa ilisema kuwa IRGC linaendelea kuwa katika kiwango cha juu zaidi cha utayari na msimamo wa kuendeleza mapambano, likionya kwamba kitendo chochote kipya cha uchokozi kitapewa jibu la haraka, la wazi, na lenye nguvu, ikiwemo mashambulio yanayoweza kupiga zaidi ya kile adui anachoweza kukadiria dhidi ya mali zake zilizobaki katika eneo hili.