Kenya yaomba msaada kwa ajili ya kukabiliana na ukame

Serikali ya Kenya imeomba msaada wa mashirika ya kimataifa kwa ajili ya kukabiliana na ukame ulioikumba nchi hiyo.

Serikali ya Nairobi imetangaza leo kuwa inahitajia msaada wa mashirika ya kimataifa wa dola zisizopungua milioni 114 kwa ajili ya kukabiliana na athari za ukame mkubwa ulioikumba nchi hiyo.

Kwa mujibu wa duru rasmi za Kenya idadi ya watu wanaokabiliwa na uhaba wa chakula imeongezeka kutoka milioni moja na laki tatu mwezi Agosti mwaka jana na kufikia milioni tatu hadi mwezi Februari mwaka huu na kwamba kuendelea kwa ukame kumesababisha bei za bidhaa za vyakula kupanda kwa asilimia 10 hadi 20.

Manoa Esipisu, msemaji wa Rais wa Kenya ametangaza kuwa hadi sasa serikali imetenga bajeti ya dola milioni sabini na tatu kwa ajili ya kukabiliana na athari za ukame, ambapo milioni 45 kati ya hizo zimetumika katika awamu ya kwanza ya mpango wa kukabiliana na baa hilo.

Huku akiashiria kwamba zaidi ya asilimia 30 ya wakaazi wa maeneo ya kaskazini mwa Kenya hususan wa eneo la Turkana wanakabiliwa na lisheduni ya kiwango cha juu kabisa, Esipisu ametanabahisha kuwa ukame unatishia zaidi maisha ya wazee na watoto wenye umri chini ya miaka mitano.

Ofisi ya Umoja wa Mataifa ya uratibu wa misaada ya kibinadamu imetangaza katika ripoti yake ya indhari kwamba kulingaana na makadirio yaliyofanywa, kuanzia mwezi Julai mwaka huu, hali ya usalama wa chakula itakuwa mbaya zaidi katika nchi za eneo la Pembe ya Afrika za Somalia, Ethiopia, Eritrea na Kenya na wakaazi wa eneo hilo watakabiliwa na hali mbaya ya uhaba wa chakula.../