“Usalama ni Mstari Mwekundu”: Iran yaapa kujibu vikali vitisho vinavyozidi kuongezeka

Baraza la Ulinzi la Iran limelaani vitisho vinavyozidi kuongezeka, kauli za uchochezi na matamshi ya kuingilia mambo ya ndani, hususan kutoka Marekani,  dhidi ya Jamhuri ya Kiislamu ya Iran, likionya kuwa shambulio lolote dhidi ya usalama, uhuru au mipaka ya ardhi ya taifa litakabiliwa kwa majibu makali.

Katika taarifa iliyotolewa Jumanne, Baraza la Ulinzi limesisitiza kuwa usalama, uhuru na mipaka ya ardhi ya Iran ni mistari myekundu isiyovukwa, na kwamba uchokozi wowote au uhasama utajibiwa kwa hatua imara.

Taarifa hiyo ilibainisha: “Kwa kurudia na kuongeza kauli za vitisho na matamshi ya kuingilia, kinyume na kanuni za sheria za kimataifa, maadui wa muda mrefu wa ardhi hii,  ambao mara kwa mara wamekiri wazi kuhusika katika mauaji ya wanawake na watoto wa Kiirani, wanaendeleza mkakati wa makusudi wa kujaribu kuisambaratisha Iran na kuharibu misingi ya taifa. Njia hii si msimamo wa kisiasa pekee, bali ni sehemu ya mtindo wa shinikizo na vitisho, na kamwe haiwezi kuachwa bila majibu, bila gharama, au nje ya hesabu za sasa.”

Taarifa hii imekuja kama jibu wazi kwa Rais wa Marekani Donald Trump, ambaye hivi karibuni alitoa vitisho kupitia mitandao ya kijamii na tena katika mahojiano mafupi, akisema kuwa Marekani ingewaunga mkono wale wanaosambaza hali ya kutokuwa na usalama na ghasia, na kwamba yeye binafsi angekuja “kuwaokoa.”

Wiki iliyopita, maandamano yalizuka baada ya wafanyabiashara wa Tehran kufunga maduka yao kwa muda kupinga kuporomoka kwa thamani ya sarafu ya taifa, ambayo ilianguka kwa kiwango cha chini kabisa dhidi ya sarafu za kigeni..

Maafisa wa Iran wamekiri shinikizo la kiuchumi linalowakabili wananchi na wamesema maandamano ya amani ni halali. Hata hivyo, wameonya kuwa makundi yanayoungwa mkono na wageni yanajaribu kutumia hali hiyo kuchochea vurugu na fujo.

Baraza la Ulinzi la Iran, lililoanzishwa kufuatia vita vya siku 12 kati ya Iran na Israel mwezi Juni, limehitimisha taarifa hiyo kwa kusisitiza kuwa vitisho na kuingilia mambo ya ndani ni vitendo vya uhasama. Limeonya kuwa kuendeleza mkondo huo kutaleta matokeo makubwa, na kwamba waanzilishi wa njia hiyo watawajibika kikamilifu kwa athari zitakazojitokeza.