Pars Today

Hamjambo wapenzi wasikilizaji na karibuni kujiunga nami katika makala hii ambayo huangazia baadhi ya mafanikio katika uga wa sayansi, tiba na teknolojia nchini Iran na maeneo mengine duniani. Ni matumaini yangu kuwa mtaweza kunufaika.

Iran imeorodheshwa ya 75 kati ya nchi 185 katika teknolojia na uvumbuzi. Orodha hii imetangazwa na Shirika la Umoja wa Mataifa la Biashara na Maendeleo (UNCTAD).

UNCTAD imeainisha aina 17 za teknolojia kama teknolojia zinazopewa kipaumbele ikiwa ni pamoja na akili mnemba au Artificial Intelligence, Intaneti ya Vitu (IoT), data kubwa, 5G, uchapishaji wa 3D, robotiki, teknolojia ya ndege zisizo na rubani, sola photovoltaic, nishati ya jua iliyokolea, nishati ya mimea, biogasI na biomasI, nishati ya upepo, hidrojeni ya kijani, magari ya umeme, nanoteknolojia na ubadilishaji wa jeni.

Mwelekeo wa kimataifa katika miaka michache ijayo utazingatia ujuzi, na elimu inachukuliwa kuwa kipengele muhimu cha kukuza uvumbuzi na kuzingatia mwelekeo, hasa kuhusu maendeleo ya haraka katika uwanja wa teknolojia ya habari.

Katika ripoti hii, muundo wa Fahirisi ya Utayari wa Teknolojia ya Mipaka, ulinganisho wa utendaji wa nchi katika ngazi za kimataifa na kikanda, na nafasi ya Iran katika Fahirisi ya Utayari wa Teknolojia Ibuka ilitayarishwa katika sehemu tatu mwaka 2022.

Kielezo cha Utayari wa Teknolojia Ibuka hupanga nchi ulimwenguni kulingana na uwezo wao wa kutumia na kurekebisha teknolojia ibuka.

Katika faharasa hii, uwezo wa kiteknolojia unaohusiana na uwekezaji halisi, rasilimali watu, na juhudi za kiteknolojia huzingatiwa na kujumuisha uwezo wa kitaifa wa kutumia, kukubali na kukabiliana na teknolojia hizi.

Tangu mwaka wa 2016, nafasi ya Iran katika faharasa hii imeongezeka na imepandishwa daraja kutoka 126 duniani mwaka 2008 hadi 78 mwaka 2022.

Iran yapata medali sita za dhahabu katika Olympiadi

Wanafunzi wa shule wa Iran walishika nafasi ya pili na kunyakua medali sita za dhahabu katika Olympiadi ya Pili ya Ulimwengu ya Wazi ya Astronomia.

Mashindano hayo yaliandaliwa na Russia katika Kituo cha Elimu cha Sirius kuanzia Novemba 14 hadi 22.

Washiriki walihudhuria hafla hiyo ana kwa ana na pia kwa njia ya intaneti na Russia ikashika nafasi ya kwanza katika shindano hili.

Hafla hiyo ilileta pamoja wanaastronomia wachanga wenye vipaji zaidi na wataalamu bora kutoka Iran, Peru, Belarus, Venezuela, na nchi nyinginezo.

Zaidi ya hayo, wanafunzi wa Cuba, Mongolia, na Kazakhstan walishiriki kwa njia ya intaneti ambapo walikamilisha maswali waliyopewa chini ya uangalizi wa video.

Ikijumuisha hatua nne, za kinadharia, vitendo, uchunguzi na ziara ya moja kwa moja—Olympiadi hii iliangazia programu yenye kuboresha elimu yenye mihadhara.

Kwa raundi nne za Olympiad, wanafunzi walilazimika kutatua kazi 97. Waandishi walitathmini uwezo wa washiriki kufanya kazi na chati za nyota, kuchakata data, na kufanya uchanganuzi na ubashiri.

Wanachama wa timu ya Olympiad ya Unajimu ya Iran, akiwemo Hananeh Khorram Dashti, Aria Fateh Kerdari, Ashkan Farrokhzadi, Yasman Farrokhi, Mohammad Mehdi Keshavarzi na Ali Naderi Lordjani, walifanikiwa kushinda medali 6 za dhahabu.

Mafanikio bora ya wanafunzi wa Iran katika Olympiads ya kimataifa yameiweka nchi hii miongoni mwa mataifa matano bora duniani katika olimpiadi za kisayansi.

Elham Yavari, mkuu wa Shirika la Kitaifa la Kukuza Vipaji Bora linalojulikana kama SAMPAD, hivi karibuni alisema Iran ni kati ya nchi tano bora ulimwenguni katika Olympiads za kimataifa.

Yavari ameashiria mpango wa mageuzi ulioidhinishwa na Wizara ya Elimu ya Iran mwaka 2011 ambao ulifafanua matarajio ya miaka 20 ya kuinua viwango vya elimu na uboreshaji wa mfumo wa elimu nchini kote.

Mkuu huyo wa SAMPAD amesema mpango huo uliopewa jina la Hati ya Marekebisho ya Msingi, unaelimisha wanafunzi katika nyanja sita za michezo, sayansi, ujasiriamali na uchumi, jamii, dini na utamaduni.

Uwekezaji mkubwa wa Tanzania katika Tehama

Naibu Waziri wa Elimu, Sayansi na Teknolojia nchini Tanzania  Omar Kipanga amesema serikali imeendelea kufanya uwekezaji mkubwa katika Taasisi za Elimu ya Juu nyanja ya tehama ili kusaidia kuzalisha wataalamu wengi na mahiri watakaosaidia maendeleo ya uchumi wa kidigitali. Mhe. Kipanga alitoa kauli hiyo hivi karibuni jijini Arusha wakati akifungua Maadhimisho ya Miaka 6 ya Kituo cha Umahiri katika TEHAMA cha Taasisi ya Sayansi na Teknolojia ya Nelson Mandela (NM AIST), ambapo amesema ustawi wa baadaye wa uchumi wa Afrika utategemea kiwango cha uwekezaji katika sayansi, teknolojia na uvumbuzi. ‘’Suala la ubunifu litaendelea kuwa muhimu katika ukuaji wa uchumi kupitia sekta mbalimbali ikiwemo kilimo na usafirishaji, katika miongo ijayo uwezo wa uvumbuzi ni muhimu kwa ajili ya ushindani kitaifa na kimataifa’’ alisema Mhe. Kipanga.

Aliongeza kuwa serikali ya awamu ya sita chini ya Rais Mhe. Samia Suluhu Hassan imewajibika kikamilifu katika kufanya uwekezaji mkubwa kwanza kwenye miundombinu, kusomesha wataalamu mbalimbali lakini pia katika kuhakikisha inaandaa bajeti ambayo itawezesha masuala ya tehama kutumika kwa ufanisi.

Naye Makamu Mkuu wa Taasisi ya Afrika ya Nelson Mandela ya Sayansi na Teknolojia Prof. Maulilio Kipanyula alisema tangu kuanzishwa kwa Kituo hicho wameweza kuzalisha wahitimu 136 ambao wanatoka katika nchi wanachama za Jumuiya ya Afrika Mashariki.

Prof. Kipanyula amesema kituo hicho kinajivunia mafanikio makubwa ikiwemo kutoa ufadhili kwa Wanafunzi wote katika nchi za Afrika Mashariki kusoma katika Taasisi yao.