Raisi: Iran iko tayari kuhamisha uzoefu wake na kubadilishana mafanikio na Uganda

Rais wa Iran ameashiria kuanza kazi ofisi ya uvumbuzi na teknolojia ya Iran huko Uganda na uwezo mkubwa mzuri wa Jamhuri ya Kiislamu ya Iran khususan katika nyanja za tiba, sayansi, teknolojia na kilimo, na kueleza kuwa Iran ipo tayari kuhamisha uzoefu wake katika nyanja hizo na katika kalibu ya kustawisha ushirikiano wa kibiashara na kiuchumi kati yake na Uganda.

Rais Ebrahim Raisi wa Jamhuri ya Kiislamu ya Iran jana asubuhi aliwasili katika uwanja wa ndege wa Nairobi na kulakiwa na viongozi wa Kenya na kisha akapokewa rasmi na mwenyeji wake Rais William Ruto wa Kenya katika ikulu ya nchi hiyo.  

Rais wa Iran jana baada ya kukamilisha ratiba ya ziara yake huko Kenya alielekea Kampala mji mkuu wa Uganda akifuatana na Waziri wa Mambo ya Nje;  ambapo alilakiwa rasmi na Rais wa nchi hiyo Yoweri Kaguta Museveni.  

Shirika la habari la IranPress limeripoti kuwa, Rais Raisi sambamba na kupongeza misimamo ya Uganda ya kukabiliana na makundi yenye misimamo mikali na ugaidi ametaja sera za Mapinduzi ya  Kiislamu za kupinga ukoloni na harakati ya kutetea wanaodhulumiwa na uhuru duniani, kuwa nukta ya pamoja inayozikutanisha Iran na Uganda. Rais Ebrahim Raisi amebainisha hayo katika mkutano wa pamoja wa jumbe za ngazi ya juu za Jamhuri ya Kiislamu ya Iran na Uganda huko Kampala. 

Rais wa Iran amesema, nchi za Magharibi zimeshambulia msingi wa familia, zimeeneza hali mbaya ya ushoga,  misimamo mikali na ugaidi, na kutumia suala la haki za binadamu kama wenzo wa kuzishinikiza nchi huru duniani; ambapo kustawisha uhusiano na ushirikiano wa kiutamaduni kati ya Iran na Uganda ili kukabiliana na njama za maadui wa mataifa haya kutakuwa na umuhimu mkubwa.

Katika ziara yake huko Uganda, Raisi pia ameunga mkono pendekezo la Rais wa Uganda kuhusu kustafidi na uzoefu wa Iran kwa ajili ya kubuni na kuongeza thamani katika sekta ya nishati, na akasema Iran iko tayari katika uwanja huo.