Rais wa Afrika Kusini aitaka dunia kuishinikiza Israel kusitisha mashambulizi huko Gaza, Lebanon
Rais wa Afrika Kusini jana aliwataka vingozi wa nchi mbalimbali duniani kuushinikiza utawala wa Israel ili kusitisha mashambulizi yake katika Ukanda wa Gaza na Lebanon.
"Tunatoa wito wa kusitishwa mauaji na mashambulizi mara moja huko Gaza. Kuachiliwa kwa mateka na pia kuhakikisha misaada ya kibinadamu inawafikia watu", amesema Rais Cyril Ramaphosa akiwahutubia wafuasi wa chama tawala ANC mjini Johannesburg akiadhimisha siku 100 za kuwa kwake madarakani.
Chama cha ANC ambacho kimeiongoza Afrika Kusini tangu mwaka 1994 kilipoteza viti vingi vya uwakilishi bungeni katika uchaguzi wa taifa wa mwezi Mei mwaka huu na hivyo kulazimika kuunda serikali ya muungano.
Ramaphosa ameeleza kuwa siku kadhaa zijazo serikali yake itawasilisha kesi yake kamili katika Mahakama ya Kimataifa ya Haki ya (ICJ) katika kuwaunga mkono wananchi wa Palestina dhidi ya mauaji ya kimbari yanayoendelea kufanywa dhidi ya wananchi wa Palestina khususan huko Gaza.
Amesema serikali yake itahakikisha inaendelea kusaidia watu wa Palestina.
Afrika Kusini iliwasilisha kesi yake katika mahakama hiyo ya mjini The Hague mwishoni mwa mwaka jana ikiituhumu Israel, ambayo inatekeleza mauaji ya kimbari na mahambulizi ya kinyama katika Ukanda wa Gaza tangu Oktoba mwaka jana, kwa kushindwa kutekeleza ahadi zake kwa mujibu wa Mkataba wa Mauaji ya Kimbari wa mwaka 1948.
